~
காதலுக்கென்று நிறைய தடைகளை சமூகம் உருவாக்கி வைத்திருக்கிறது. சமீபத்திய காதல் கதைகளில் அந்த தடைகள் படிப்படியாக வெவ்வேறு விதங்களில் உடைக்கப்படுவதை பார்க்க முடிகிறது. தன்னிறைவு நிதி நிலையில் இருக்கக்கூடிய காதலர்களால் தங்களால் இயன்ற விதத்தில் காதலை திருமண பந்தத்தில் சாத்தியப்படுத்தி விட முடிகிறது. நல்ல பெற்றோர்கள், நண்பர்கள் நிறைய நேரங்களில் மத அல்லது சாதி வித்தியாசங்களை உடைக்க இம்மியளவு பயன்படுகிறார்கள். இதற்கு முந்தைய காலகட்டத்தில் காதலுக்கான தடைகளாக இருந்த இவைகளைப் போல நம்பிக்கையற்ற அல்லது பாதுகாப்பற்ற மனப்போக்கு ஒரு முக்கியமான காரணமாக இப்போது தோன்றுகிறது.
நாம் பிறரை பார்த்து பார்த்து வளர்ந்தே பழகிவிட்டபடியால் யாரைப் பற்றியும் சிந்திக்காமல், யாரோடும் தொடர்புபடுத்திக் கொள்ளாமல் தனக்கென்று ஒரு காதலை கையிலெடுக்க முடிவதில்லை. தோல்வியில் முடிவது அல்லது வெறுப்பில், நெருக்கமற்ற நிலையில் தொடரக்கூடிய உறவாக இந்த காதல் ஆகிவிடுமோ என்ற பயம் காதலை அணுக மேலும் ஒரு தடையாய் இருக்கிறது.
தனியாகவே இருக்க நினைப்பது எப்படி முட்டாள்தனமானதோ அதே போல் தவறான துணையை தேர்ந்தெடுப்பதும் முட்டாள்தனமே. இதை அறிவுப்பூர்வமாக கையாள முடியாமல் மனதோடு போட்டி போடவும் தெரியாமல் திக்குமுக்காடி காதலில் விழுந்து, எழுந்து, வாழ்ந்து தீர்ப்பதில் நிறைய சுவாரசியம் இருக்கத்தான் செய்கிறது. இந்த சுவாரசியம் என்ற காரணமெல்லாம் வாழ்வதற்கு மட்டும்தான் தேவையாய் இருக்கிறது. தேர்ந்தெடுப்பதற்கு ஒரேயொரு முட்டாள்தனமான காரணம் போதுமாயிருக்கிறது.
"எனக்கு அவள புடிக்கும்" ❤
