போர்வையின் நினைவு!

~

மிகச்சிறிய போர்வைக்குள் எத்தனை விதமான நினைவலைகள். கோபம், கவலை, வருத்தம், தயக்கம், காதல் தொடங்கி தேடல் வரை அத்தனையையும் தாங்கி நிற்கிறது அந்த போர்வை.

கதகதப்புக்கென்று கொஞ்சம் இழுத்துப் போர்த்திக் கொள்கிறேன். ஒவ்வொரு இழுப்புக்கும் ஒரு அடி நெருங்கி வந்து வெவ்வேறு விதமான உரையாடல்களை நிகழ்த்தி விட்டுப் போகிறது உன் நினைவு.

முதல் இழுப்பில் என்னோடு இருந்த நீ, இரண்டாவதில் கொஞ்சம் தள்ளி அமர்ந்து கொண்டாய். மூன்றாவது இழுப்பில் கண்ணத்தில் இரண்டு அறைகளும், நான்காவதில் தூங்குடா என்ற வார்த்தையும் சொல்லி கால் பிடித்து விட்டாய். காலில் இருக்கமாய் சுருண்டிருந்த போர்வை மேல் தூக்கி தலைக்கும் சேர்த்து போர்த்தினேன்.

முற்றும் இருளும், கடுங்குளிரின் மீள்விற்கு கொஞ்சம் கதகதப்பும் தந்து விட்ட போர்வைக்குள் இறுதியாக நீயொரு முத்தத்திற்கு நெற்றிக்கு தந்து விட்டு மூச்சுக்காற்றை உள்ளூறப் பரவிட செய்தாய்.

ஒவ்வொரு இரவுக்குள்ளும் ஓராயிரம் நினைவிருக்கும். போர்வை போர்த்திய மனிதருக்கும் எத்தனையோ கதைகளிருக்கும். போர்வை தரும் கதகதப்பை யாரோவொருவரின் நினைவுக்கு பரைசாற்றி விட முடிந்தால் எல்லா இரவையும் நிம்மதியாக கடந்து விடலாம்தானே!